Hargeysa (Raxanreeb online) – Madaxweynaha cusub ee Somaliland, C/raxmaan Maxamed C/llaahi Cirro, ayaa maanta oo Khamiis ah lagu dhaariyay magaalada Hargeysa ee xarunta maamulka Somaliland.

Munaasibadan oo ay ka soo qayb galeen masuuliyiin ka socday dalka Itoobiya, wakiilo ka socday Maraykanka iyo Ingiriiska iyo wakiilka Taiwan.

Guddoomiye Cirro oo 69 jir ah oo mucaarid ah, horena u ahaa guddoomiye Baarlamaan, ayaa xilka la wareegay ka dib markii uu ku guulaystay 50% codadkii la dhiibtay, doorasho si adag loogu tartamay. Waxa uu xilka kala wareegayaa Muuse Biixi Cabdi oo ku amaanay biseylka dimuqraadiyadeed ee Somaliland muddadii xil wareejinta.

Guddoomiye Cirro oo khudbad ka jeediyey furitaankii shirka ayaa ballan qaaday inuu wax walba ka hormarin doono midnimada qaranka, maamul wanaagga iyo xallinta colaadaha gobollada sida Sool, Sanaag iyo Togdheer. Waxa kale oo uu ka go’an yahay in la xoojiyo ciidamada Somaliland si ay u sugaan xuduudaheeda iyo raadinta aqoonsiga caalamiga ah ee dhulka ka goostay.

“Maanta, waxa aanu furnay bog cusub oo lagu dhisayo Somaliland oo midaysan oo dimuquraadi ah, kuna dhisan dawlad wanaag, cadaalad iyo sharci,” ayuu yidhi Cirro.

Muuse Biixi Cabdi waxa uu iftiimiyey horumarka ay Somaliland ka samaysay dawladnimada nabadda ah, waxaanu yidhi, “Somaliland waxa ay caddaysay qiimaheeda dimuqraadiyadeed, oo ay awooddu la timaaddo shacabka, in danta qaranku ka sarrayso himilooyinka gaarka ah.
Somaliland ayaa ku dhawaaqday inay ka go’day Soomaaliya sannadkii 1991-kii, balse weli ma jirto aqoonsi caalami ah. Iyadoo taasi jirto, waxay ka shaqeysay sidii loo yagleeli lahaa dowlad dimoqraadi ah iyo in la ilaaliyo xasiloonida gobol aan xasilooneyn.

Caleemo-saarkan ayaa ku soo beegmay saacado yar ka dib markii ay Soomaaliya iyo Itoobiya ku heshiiyeen go’aan wada jir ah oo ay ku xalinayaan khilaafkooda ku saabsan maamul-goboleedka la baxay Somaliland iyo Itoobiya oo aan bad lahayn.

Labada dal ee jaarka ah ee Geeska Afrika ayaa xiisado colaadeed cirka isku sii shareeray tan iyo markii ay Itoobiya bishii January heshiis la gashay maamul-goboleedka Soomaaliyeed ee Somaliland, kaas oo ku saabsanaa in dhul xeebeedkeeda laga kireeyo deked iyo saldhig ciidan oo ay Itoobiya yeelato, si ay aqoonsi diblomaasiyadeed u hesho, inkasta oo aanay Addis-ababa marna ka bixin. taas ayaa xaqiijisay.