Galgaduud (Raxanreeb online) – Warar kala duwan ayaa kasoo baxaya dagaal culus oo ka dhacay deegaanka Masagawaa ee bariga gobolka Galgaduud kaas oo u dhexeeyay ciidamada dowladda iyo Al-Shabaab.

Dagaalka ayaa waxaa qaaday ciidamada dowlada iyo kuwa macaawisleyda waxaana kadib iska caabin ay kala kulmeen xubnaha Al-Shabaab oo ku sugnaa aagga deegaanka Masagawaa.

Wararka qaar ayaa intaasi kusii daraya in dagaal saacado badan qaatay uu ka dhacay halkaasi waxaana la’isku adeegsaday hubka noocyadiisa kala duwan sida ay sheegeen dadka deegaanka.

Saraakiil ka tirsan ciidanka Xoogga dalka ayaa sheegay warbaahinta in guul wayn ka gaareen dagaalka ayna khasaare xoogleh gaarsiiyeen Al-Shabaab oo isku aruusanayay halkaasi.

Xaaladda ayaa haatan ah mid aad u kacsan mana jiro wax hadal ah oo kasoo baxay dhinaca Al-Shabaab oo ku aadan dagaalkaasi.