Beydhabo (Raxanreeb online) – Ra’iisul Wasaaraha Xukuumadda Federaalka ah ee Soomaaliya Xamza Cabdi Barre ayaa shir guddoominayay kulan xasaasi ah oo uu magaalada Baydhabo kula qaatay Golaha Wasiirada Koonfur Galbeed. Kulanka ayaa diiradda lagu saaray sidii loo dardargelin lahaa iskaashiga iyo wax ka qabashada arrimaha muhiimka ah sida xasilloonida siyaasadda, kobaca dhaqaalaha, iyo amniga, iyadoo diiradda lagu saaray dardar gelinta dagaalka ka dhanka ah kooxda xagjirka ah ee Al-Shabaab.

Madaxweynaha Dowlad Goboleedka Koonfur Galbeed C/casiis Maxamed Xasan Lafta-gareen ayaa warbixin dhinacyo badan taabanaysa ka jeediyay xaaladda bulsho, siyaasadeed iyo dhaqaale ee uu deegaanku marayo. Wuxuu carabka ku dhuftay caqabadaha iyo horumarka laga gaaray howlgallada lagu sugayo amniga ee lagu ciribtirayo Al-Shabaab.

Ra’iisul Wasaare Xamza ayaa ku celceliyay muhiimadda ay leedahay wadashaqeynta Dowladda Federaalka iyo Dowlad Goboleedka Koonfur Galbeed si loo xaqiijiyo guulaha laga gaarayo qorshayaasha horumarineed iyo kuwa xoreynta. Wuxuu carrabka ku adkeeyay in dadaallada mideysan ay muhiim u yihiin in la gaaro xasillooni iyo kobac mustaqbalka fog ah oo gobolka ah.