Kampala (Raxanreeb online) – 117 Askari oo ka tirsan Ciidanka Booliska Uganda, oo ka kooban 32 haween ah, ayaa billaabay qiimeyn adag oo ka hor inta aan la keenin, si ay ugu diyaar garoobaan howshooda soo socota ee Howlgalka Taageerada iyo Xasilinta Midowga Afrika ee Soomaaliya (AUSSOM).

Habka qiimaynta, oo loogu talagalay in lagu tijaabiyo xirfadahooda iyo u diyaargarowga hawsha, waxa ay koobaysaa qiimayno kala duwan, oo ay ku jiraan fahamka akhriska, qorista warbixinta, wadista baabuurta, iyo xirfadaha toogashada. Saraakiishan ayaa la geyn doonaa Soomaaliya muddo hal sano ah, halkaas oo ay uga shaqeyn doonaan qeyb ka mid ah kooxaha sida gaarka ah u tababaran ee Booliska (SPTs), iyagoo ka qeyb qaadan doona dadaallada nabad ilaalinta iyo xasilinta gobolka.

Komishaneer Okosh Simon Peter, Ku-xigeenka Agaasimaha Hawlaha, ayaa carrabka ku adkeeyay muhiimadda ay leedahay anshaxa iyo daacadnimada, isagoo ku boorriyay saraakiisha inay ilaaliyaan qiyamkan inta lagu jiro hannaanka qiimeynta iyo inta lagu jiro doorkooda nabad ilaalinta ee caalamiga ah.

Taliyaha Boliska Polly Namaye, oo ah madaxa Hawlgallada Taageeradda Nabadda ee Boliska Uganda, ayaa muujiyay kalsoonida lagu qabo kartida Saraakiisha, isagoo ku dhiirri-geliyay inay u adeegaan Safiiro ku dayasho mudan oo Nabadda inta ay gudanayaan waajibaadkooda Somalia.

Hawlgalka waxaa hogaaminaya ACP Emmanuel Lithakong Ntalaba, oo ka socda Komishanka Midowga Afrika – Qaybta Hawlgalka Taageerada Nabadda, isaga oo hubinaya in howlgalku la socdo heerarka AU iyo ujeedooyinka.

Hawlgalka Taageerada iyo Xasilinta Midowga Afrika ee Soomaaliya (AUSSOM) ayaa lagu wadaa inuu beddelo Hawlgalka Ku-meel-gaarka ah ee Midowga Afrika ee Soomaaliya (ATMIS) Janaayo 2025. AUSSOM waajibaadkeeda waxaa ka mid ah inay taageerto Ciidamada Ammaanka Soomaaliya si ay u fuliyaan Qorshaha Horumarinta Amniga ee Soomaaliya, oo la ansixiyay 2023 .