Adis Ababa (Raxanreeb ) Wasiirka  arrimaha dibada  Itoobiya  oo  ka hadlayay heshiiska is afgaradka ah ee  Ra’iisulwasaare  Abiy Ahmed  iyo Muuse Biixi Cabdi ayaa sheegay in heshiiskaas uu yahay mid dhaqan gal ah.

Wasiirka arrimaha dibadda  Itoobiya Mesganu Arga ayaa  sheegay in  heshiiska  dhanka  badda ah ee ay la galeen  Somaliland micnahiisa uu yahay in ay dhankooda aqoosan yihiin madax banaanida  Somaliland.

Hadalkan ayaa  keeni kara inuu cirka isku sii shareero ,xiisada siyaasadeed ee Soomaaliya iyo Itoobiya oo ahayd waligeedba soo jirtay .

Mesganu Arga ayaa shaaca ka qaaday in dowladiisu ay Somaliland siinayso aqoonsi buuxa, islamarkaana uu kamid yahay qodobada heshiiska ay wada galeen.

“Tallaabada koowaad ee ay qaadeyso Ethiopia waa aqoonsiga Somaliland, si ay u hesho bad ay isticmaasho,” ayuu yiri wasiirka arrimaha dibadda, sida lagu baahiyay bogga BBC News Ahmaric.

Dowlada Soomaaliya ayaa dhankeeda si wayn uga soo horjeedsatay heshiiska Somaliland iyo Itoobiya, iyada oo u yeedhay safiirkeedii Addis Abbaba

Heshiiska  ay wada gareen Ra’iisulwasaaraha  Itoobiya Abiy  Ahmed iyo Madaxwayne Muuse Biix Cabdi ayaa waxa uu dhaliyay caro xoogan  waxayna Dowladda Soomaaliya ka dalbatay itoobiya in ay joojiso fara galinteeda Soomaaliya.