Liibiya (Raxanreeb online) – Dowladda Liibiya ayaa sheegtay Sabtidi in ay burburisay shabakad dadka tahriibisa oo ka dhisneyd dhinaca Koonfur-galbeed ee dalkaas, iyada oo la xiray xubno ka tirsan kooxdaas sida uu bayaan uu soo dhigay bogga Facebook ku sheegay, xafiiska xeer-ilaaliyaha guud ee Liibiya.

Sidoo kale, ciidamada ayaa xiray mid ka mid ah hoggaamiyayaasha shabakadan magafa-yaasha ah iyo 10 xubnood oo kale oo lagu eedeeyay dil, xarig sharci darro ah, jirdil, iyo kufsi loo geystay muhaajiriin, sida lagu xaqiijiyay bayaanka.

Dhanka kale, baaritaan ay dowalddu sheegtay in ay sameysay, ayaa muujiyay in kooxahani ay dhibaatooyin isugu jira xarig qasab ah, jirdil iyo baad ay ugu geysteen muhaajiriin gaareysa 1,300 oo qof. Dadkaan ayay u xirteen sifo ay uga qaataan lacago baad ah si loo sii daayo.

Liibaya ayaa fowdo lugaha la gashay, kaddib marki duullaan ay hogaamineysay NATO talada looga tuuray laguna dilay hogaamiyihi hore ee dalkaasi Muammar Gaddafi.

Ugudambeyn, wixi markaasi ka danbeeyay dalkaasi saliidda hodonka ku ah, ayaa waxaa taladiisa ku loollamayay laba dowladood oo ay kala taageeraan malleeshiyaad hubeysan.