Hargeysa (Raxanreeb online) – Somaliland ayaa digniin culus u dirtay xawaaladaha, waxayna ugu baaqday in aanay u hoggaansamin amar ka soo baxay dawladda Soomaaliya oo ay ku dalbatay in laga saaro dhammaan tixraacyada “Somaliland” adeegyadooda marka la gaadho 1-da September.

Wasiirka Warfaafinta Somaliland Cali Xasan Maxamed oo loo yaqaan Cali Mareexaan, ayaa sheegay in shirkad kasta oo u hoggaansata amarka Soomaaliya loo aqoonsan doono inay gaf ka gashay Somaliland.

“Shirkad kasta oo fulisa awaamiirta ka soo baxda Villa Somalia ama ka soo jeeda dhulkaas yar ee aadka loo ilaaliyo ee ka baxsan Dayniile, waxay ku xad-gudbi doontaa qaranimada Somaliland, Somaliland-na way kula xisaabtami doontaa,” ayuu yidhi Mareexaan.

Awaamiirta ka soo baxday Muqdisho ayaa si gaar ah u bartilmaameedsanaysa xawaaladaha sida Paysii, Dahabshiil, iyo Jubba Express, iyaga oo ka dalbanaya in ay meesha ka saaraan wax kasta oo “Somaliland” lagu sheego adeegyadooda internetka. Wasaaradda Ganacsiga iyo Warshadaha Soomaaliya ayaa tallaabadan ku sababeysay mid lama huraan u ah ilaalinta midnimada dhuleed ee Soomaaliya, iyadoo ka digtay in u hoggaansami la’aanta ay ka dhalan karto cawaaqib sharci.

Dalabka Soomaaliya ayaa ku soo aadaya xilli ay ku guulaysteen in ay ku qasbaan diyaaraddaha Ethiopian Airlines iyo Flydubai oo labaduba duulimaadyo ku taga Hargeysa, in ay casriyeeyaan goobaha ay ku ballansan yihiin in ay Hargeysa ka mid tahay Soomaaliya.

Somaliland oo ku dhawaaqday gooni-isu-taagga 1991-kii, waxay u shaqeysaa sidii waddan iskeed ugu dhawaaqday madaxbannaanideeda, laakiin weli ma jirto aqoonsi caalami ah, taasoo keentay halganno sharci ah oo socda. Dhanka kale, Soomaaliya waxay doonaysaa inay ilaashato midnimada dhuleed, iyadoo u aragta Somaliland qayb ka mid ah dhulkeeda.

Heshiiskii ay Itoobiya dhawaan la gashay Somaliland, kuna ogolaatay in laga dhiso saldhig ciidan iyo in la horumariyo marinka dekeda iyo gaadiidka, ayaa xiisaddaas sii kordhisay.