Muqdisho ( Raxanreeb ) Magaalada Muqdisho afar iyo labaatankii saac ee la soo dhaafay waxaa ka dhacay weeraro iyo qaraxyo waxyeelo gaystay.

Maanta degmada Yaqshiid ee magaalada Muqdisho waxaa ka dhacay qarax wadada dhinaceeda galiyay , gaar ahaan xaafada Tubawayne.

In ka badan 7 qof oo shacab ah ayaa ku dhintay tiro kalena waa ay ku dhawacmeen kuwaas oo u badnaa dad shacabka ah.

Goobjoogayaal ayaa sheegay in dadka qaar dhaawacyadooda ay cuslaayeen kuwaas oo loo qaaday isbitaalada magaalada Muqdisho halkaas oo lagu dawanayo.

Goor sii horeysay Al- Shabaab ayaa weerar gaadma ah ka fulisay degmada Dayniile ee  magaalada Muqdisho gaar ahaan goob ay ku sugnayeen ciidanka Dowladda halkaas oo ay ka dhasheen khasaare isugu jira dhimasho iyo dhaawac.

Magaalada waxaa ka jira xaalad cabsi ah oo la xiriirta in Al- Shabaab ay xoojinayso dagaalka ay ka fulinayaan caasimadda isla markaana ay gudaha u soo galeen xubno Al- Shabaab ah oo damacsan weeraro kala duwan.