Muqdisho (Raxanreeb ) Taliska ciidanka – booliska ayaa gacanta ku soo bandhigay eedaysane la sheegay in gaarigiisa laga dhax helay maydka wiil da’ahaan lagu qiyaasay lix sanno.

Ciidanka booliiska gobolka Banaadir ayaa eedaysanahan  degmada Hodan gaar ahaan agagaarka isbitaalka Digfeer ka soo qabtay nin gaari ku watay meydka ilmaha yar.

Saraakiisha ciidanka booliska ayaa lagu war-galiyay in gaarigan ku dhax jiro wiil yar, markii ay goobta tageena waxay ugu tageen wiilka yar oo dhintay kuna dhax jira gaariga.

“Ciidanka Boliiska Soomaaliyed oo baadigoobayay eedaysanaha, ayaa hadda gacanta ku haya, waxaana la horgeyndoonaa maxkamada awoodda uleh si uu cadaalada u maro” ayaa lagu sheegay war ka soo baxay Taliska  ciidanka booliska.

Booliska ayaa tilmaamay in markiiba ay goobta gaareen, isla markaana gaariga dhexdiisa ugu tageen meydka canug yar oo gaariga ku jiray, iyagoona intaas kadib xusay inay bilaabeen raadinta ninkii watay gaariga

Taliska ciidanka booliska ayaa sheegay in ay wadaan baaritaan dheeraad ah oo la xiriira hayaan kiiskan, waxa ayna sheegeen in eedeysanaha hadda gacanta booliiska uu ku jiro.

Sidoo – kale Ciidanka saldhiga Boliiska Degaanka Gubadley ayaa 4tii May 2023 gacanta ku soo dhigay nin lagu soo eedeeyay inuu dil horay u gaystay  sida booliska uu sheegay.