New York (Raxanreeb online) – Safiirka cusub ee Soomaaliya u fadhin doona dalka Mareykanka, Daahir Xasan Carab, ayaa ballan qaaday inuu sare u qaadi doono xiriirka diblomaasiyadeed ee Soomaaliya iyo Mareykanka. Xaflad sagootin ah oo ka dhacday magaalada Muqdisho oo uu isku diyaarinayey inuu la wareego xilka cusub, ayaa Danjire Carab waxa uu ka warbixiyey waxyaabaha uu mudnaanta siinayo iyo qaabka uu u gudan karo waajibaadkiisa shaqo.

Danjire Carab oo ka hadlay munaasabadda ayaa ku nuux nuuxsaday in uu xoogga saarayo xoojinta xiriirka labada dal, isagoo ugu baaqay qurba-joogta Soomaaliyeed ee ku nool Mareykanka in ay gacan ka geystaan ​​dadaalladaas. “Madaxweynuhu wuxuu i siiyay awaamiir cad. Dowladda hadda jirta waxay ujeeddooyin gaar ah ka leedahay xiriirka ay la leedahay Mareykanka, waxaana ka mid ah xoojinta xiriirka labada dal, horumarinta dhaqaalaha, horumarinta waxbarashada,” ayuu yiri Danjire Carab.

Magacaabista safiirka cusub ayaa ku soo aadeysa iyadoo qeyb ka ah isku shaandheyn ballaaran oo lagu sameynayo wakiillada diblomaasiyadeed ee Soomaaliya u jooga dalal kala duwan. Dowladda Federaalka ah ee Soomaaliya ayaa ku wargelisay safiirada cusub ee loo magacaabay inay muhiimadda koowaad siiyaan xoojinta xiriirka ka dhexeeya Soomaaliya iyo dalalka ay martida u yihiin.