Garoowe (Raxanreeb online) – Madaxweyne ku xigeenka Puntland, Ilyaas Cilmi  ayaa ku dhawaaqay in si rasmi ah loo joojiyay howlihii shirkadda Alight International ee magaalada Laascaanood, isagoo ku eedeeyay hay’adda inay ku xad-gudbiso nidaamka shaqo ee Puntland. Amarka waxaa ka mid ah in Alight International lagala noqdo ogolaanshaha shaqo ee gudaha Puntland iyo in la ogaysiiyo hay’adaha wada shaqaynta la leh hay’adda UNICEF iyo WFP si ay u joojiyaan wada shaqaynta ay la leeyihiin NGO-ga gobolka.

Hay’adda Alight International oo ah hay’ad ka shaqeysa arrimaha bini’aadantinimada iyo mashaariicda horumarineed ee gobolka Sool ayaa hadda waxaa soo food saartay caqabado ku aadan sii wadida howlaheeda shaqo, iyadoo Puntland ay ku amartay hay’adaha UNICEF, WFP iyo hay’adaha kale ee xiriirka la leh in ay joojiyaan mashaariicda hadda iyo kuwa soo socda ee Alight ay ka wado deegaanada ay maamusho.

Si kastaba ha ahaatee, awaamiirta Puntland ayaa ka hortimid C/llaahi Xirsi Timacadde oo ah guddoomiye ku xigeenka labaad ee Aqalka Sare ee Soomaaliya. Timacade ayaa ku nuux nuuxsaday in maamulka SSC Khaatumo oo maamula deegaanada lagu muransan yahay ee SSC oo kaliya uu awood u leeyahay in uu maamulo ama meesha ka saaro Alight International. Waxa uu sheegay in Alight uu ku sii sugnaan doono SSC Khaatumo, isaga oo sheegay in uu u shaqeeyo si ka madax banaan Puntland.

Arintan ayaa daba socota xiisada ka dhex aloosan SSC Khaatumo iyo Puntland oo salka ku haysa maamul goboleedka. Maamulka SSC Khaatumo ayaa dhawaan dhaliilay mas’uuliyiinta Puntland u magacaawday gobolka Sool, iyagoo u arkayay mid meel ka dhac ku ah maamulka SSC.

Khilaafkan ayaa hoosta ka xariiqaya khilaafyada maamul ee ka jira gudaha Soomaaliya, iyadoo Puntland iyo SSC Khaatumo ay isku hayaan awood iyo gacan ku haynta dhulalka muhiimka ah.