Nin doon yar ku kalluumeysan jiray ayaa mar kasta ka caban jiray shaqada uu hayo iyo dakhliga yar ee uu ka heli jiray. Wuxuu had iyo jeer Alle ka baryi jiray in uu ugu beddelo wax ka kheyr badan.

Maalin maalmaha ka mid ah, dabeyl xoog leh ayaa ku dhufatay badda, waxayna ka baabi’isay doontiisii yareyd. Ninkii wuxuu ku go’doonsanaa jasiirad cidlo ah, cid uu kaalmo ka heli karana ma jirin. Maalin kasta wuxuu Alle ka baryi jiray in uu meeshaas ka badbaadiyo, balse cidna uma iman.

Wuxuu urursaday wixii uu heli karay, wuxuuna ka dhistay meel yar oo uu kaga gabado qabowga iyo roobka. Maalin galab ah, isagoo ugaarsi kasoo noqday, ayuu arkay hoygiisii oo dab qabsaday. Wax kasta oo uu urursaday oo uu kaydsadayna way ku gubteen.

Aad ayuu u murugooday, wuxuuna gacmaha kor u taagay isagoo leh:

“Ilaahow, maxaan sameeyay? Maxay wax walba sidan iigu dhacayaan? Goormaan dhibkan ka baxayaa?”

Ninkii ugu dambayn wuu suuxay. Markii uu soo toosayna wuxuu isku arkay isagoo saaran markab.

Wuxuu kabtanka weydiiyay sida ay ku heleen. Kabtankii ayaa ugu jawaabay:

“Annagoo badweynta mareynay ayaan meel fog ka aragnay qiiq badan. Waxaan go’aansannay inaan u soo leexanno si aan u ogaanno halka uu qiiqu ka imanayo. Sidaas ayaan adiga kuugu helnay. Haddii aynaan arki lahayn qiiqa dabka, meesha kuma soo leexan lahayn, kumana heli lahayn.”

Ninkii wuxuu kabtanka uga sheekeeyay xaaladdiisa iyo sida uu noloshiisa oo dhan uga shaqeyn jiray badda, isagoo sheegay in xirfadda keliya ee uu yaqaanay ay ahayd kalluumeysiga iyo shaqada badda.

Kabtankii iyo shaqaalihii markabka ayaa u fidiyay fursad uu markabka uga shaqeeyo, isaga oo helay shaqo iyo dakhli wanaagsan. Sidaas ayuu ninkii ku bilaabay nolol cusub, isagoo markii dambe fahmay in wixii uu u arkayay musiibo ay noqdeen jidkii uu kaga baxay dhibaatadii.

Casharka Nolosha

Nolosha waxaa mararka qaar kugu dhacaya dhibaatooyin aad u aragto kuwo aan xal lahayn. Waxaad u maleyn kartaa in wax walba kaa lumeen, laakiin mararka qaar waxa aad u aragto musiibo ayaa noqon kara albaabka uu Alle kuu furayo ee kheyrka.

Waxaan Alle ka barynaa isbeddel, nolol wanaagsan iyo fursado cusub. Laakiin marka imtixaan yar nala soo gudboonaado, mararka qaar waxaa naga yaraada sabriga, dulqaadka iyo tawakkulka.

Waxaa laga yaabaa in waxa aad maanta ka murugaysan tahay uu berri noqdo sababta farxaddaada. Waxaa laga yaabaa in albaab kuu xirmay uu yahay sababta aad ugu heli lahayd albaab ka kheyr badan.

Alle SWT wuxuu Qur’aanka Kariimka ah ku yiri:

“Waxaa laga yaabaa inaad necebtihiin wax isagoo kheyr idiin ah, waxaana laga yaabaa inaad jeclaataan wax isagoo shar idiin ah. Eebbe ayaa og, idinkuna ma ogidin.”

(Al-Baqarah: 216)

Sidaas darteed, marka ay noloshu kugu adkaato, ha degdegin inaad tiraahdo “wax walba way iga xumaadeen.” Waxaa laga yaabaa in waxa maanta ku dhaawacaya uu yahay jidka uu Alle kuugu diyaarinayo wax aad berri uga mahadceliso.

Sabriga, ducada iyo tawakkulka ha ka quusan. Sida aad wax u aragto ma aha mar walba sida ay xaqiiqadu tahay; Rabbigaa og waxa adiga kuu kheyr badan.