Muqdisho (Raxanreeb online) – Wafdi dhexdhexaadin ah oo ka socda Kenya oo uu hoggaaminayo Xoghayihii hore ee fulinta IGAD Danjire Maxbuub Macalin ayaa gaaray magaalada Kismaayo si ay wax uga qabtaan khilaafka siyaasadeed ee u dhaxeeya Jubaland iyo dowladda Federaalka Soomaaliya. Dadaalkan ayaa daba socda codsi rasmi ah oo uga yimid madaxweynaha Soomaaliya Xasan Sheekh Maxamuud, kaasoo ku baaqay in xal laga gaaro khilaafka soo kala dhexgalay madaxda maamul goboleedyada iyo madaxda federaalka.

Wafdiga heerka sare ah waxaa ka mid ah shaqsiyaad caan ah oo ay ka mid yihiin Maxamed Cabdi Afey iyo C/raxmaan Colow oo labaduba khibrad weyn u leh arrimaha diblomaasiyadda iyo gobolka. Booqashadooda ayaa hoosta ka xariiqaysa sida ay gobolka uga go’an tahay nabadeynta iyo xasilloonida gudaha Soomaaliya, sida lagu sheegay war-saxaafadeed ka soo baxay madaxtooyada Jubbaland.

War saxaafadeedka ayaa lagu sheegay in madaxweynaha Jubaland Axmed Madoobe uu wafdiga soo dhaweeyay markii ay soo gaareen magaalada Kismaayo, isagoo rajo wanaagsan ka muujiyay in wada-hadalladan ay wax weyn ka tari doonaan khilaafka iyo xoojinta wadashaqeynta dowladda Federaalka iyo Jubaland.

Kulanku wuxuu muujinayaa tallaabo muhiim ah oo loo qaaday dib-u-heshiisiin suurtagal ah, iyada oo dhexdhexaadiyayaashu ay higsanayaan in ay ka hadlaan arrimaha asaasiga ah iyo kobcinta wadahadalka labada dhinac. Waxay muujineysaa dadaallada socda ee Soomaaliya ay ku dooneyso in lagu gaaro hab mideysan oo dowladnimo iyadoo ay caqabado kala kulmaan dowladaha xubnaha ka ah federaalka.