Hargeysa (Raxanreeb online) – Musharax mucaaradka ah ee Somaliland, Cabdiraxmaan Maxamed Cabdullaahi Cirro, ayaa loo doortay inuu noqdo madaxweynaha xiga ee maamulka gooni-goosadka ah, guddiga doorashada ayaa maanta ku dhawaaqay natiijada hordhaca ah doorashadda.

Guddoomiye Cirro oo ah hoggaamiyaha xisbiga mucaaradka ah ee Waddani ayaa 64% ku guulaystay codadkii la dhiibtay, halka Muuse Biixi uu helay 35%, sida ay shaaciyeen guddiga doorashooyinka Somaliland. Komishanku waxa kale oo ay caddeeyeen in xisbiyada Waddani, Kaah, iyo Kulmiye ay ku soo baxeen saddexda xisbi siyaasadeed ee gobolka laga aqoonsan yahay, halka xisbiga UCID uu ku guuldarraystay inuu sii haysto maqaamkiisa.

Maxkamada sare ee Somaliland ayaa la filayaa in maalmaha soo socda ay ku dhawaaqdo natiijada rasmiga ah ee kasoo baxday doorashadda.

Natiijada doorashada waxa ay si weyn u saameysay siyaasadihii dhawaanahanba lagu muransanaa ee maamulka Muuse Biixi, oo ay ka mid ahaayeen Is-afgaradkii (MoU) ee Itoobiya la saxiixatay Somaliland, taas oo ay dowladda dhexe siweyn meel uga istaagtay.

Sidoo kale, colaadda ka taagan Laascaanood ayaa sii hurinaysa qancin la’aanta hoggaanka Muuse Biixi, taas oo qayb ka qaadatay isbeddelka siyaasadda.

Sikastaba, guusha Cabdiraxmaan Cirro waxa ay muujinaysaa isbeddel ku iman kara siyaasadda gudaha iyo gobolka ee Somaliland iyada oo gobolku sii wado raadinta aqoonsi caalami ah.