Boosaaso ( Raxanreeb Online) Warar dheeraad ah ayaa kasoo baxaya iska hor-imaad xalay ka dhacay magaalada Boosaaso  ee xarunta gobolka Bari.

Meleeshiyaad qaab qabiil u abaabulan  ayaa weerar ku qaaday saldhiga dhexe ee magaalada Boosaaso, waxaana dagaal kooban oo halkaasi ku dhex maray ciidamada amniga iyo maleeshiyaadka ku geeriyooday hal ruux oo katirsanaa maleeshiyadka weerarka soo qaaday.

Ciidamada amniga ee Saldhigga Boosaaso, ayaa iska caabiyay weerarka taasi oo keentay in raggii weeraka soo qaaday la jibiyo.

Sidoo kale Puntland ayaa ciidamo dheeraad ah geysay saldhigga si looga hortago isku day walbo oo la xiriira weerarka ku soo qaadan maleeshiyaadka.

Sikastaba, iska hor-imaadka dhex maray ciidamada amniga iyo maleeshiyadka hubeysan ayaa daba socda kaddib markii dhowaan ciidamada ammaanka ee Puntland ay qabteen hub fara badan oo maleeshiyaadka weerarka soo qaaday ay lee yihiin.