Ceelbuur (Raxanreeb ) Hay’adda Nabad Sugidda iyo Sirdoonka Qaranka, Mahad Maxamed Salaad iyo Gaashaanle Sare Xasan Cali Nuur (Shuute) oo ah Guddoomiyaha Maxkamadda Ciidamada Qalabka Sida ayaa si dirqi ah uga badbaaday in ay gacanta u galaan Kooxda Al-Shabaab.

Mahad Salaad iyo Shuute ayaa la socday diyaarad nooca qumaatiga u kaca ah oo ku sii jeeday degmada Galcad ee dhawaan laga xoreeyay, balse Galcad ayaa waxaa dib ula wareegay kooxda Al-Shabaab.

Mahad Salaad iyo Shuute ayaa ayaa saarnaa diyaarada ka duushay Dhuusomareeb iyagoo aan ogeyn in intii ay hawada ku jireen ay degmada Galcad gacanta u gashay kooxda Al-Shabaab.

Digniintan naxdinta leh ayaa timid dhowr daqiiqo ka hor intii aysan diyaaradda helicopter-ka ah ay ku degin degmada Galcad.

Waxay isla markiiba ku wargeliyeen Kabtanka Helicopter-ka, taasoo keentay in diyaaradda dib loo soo celiyo.

Magaalada Galcad oo dhawaan laga saaray gacan ku heynta Al-Shabaab ayaa markii 3-aad gacanta u gashay kooxda Al-Shabaab tan iyo markii ay duulaanka ciidamadu bilaabeen, iyadoo ay ka hortageen mas’uuliyiinta dowladda.

Dib u qabsashada Al-Shabaab ee gobolka Galgaduud ayaa muujineysa khatarta joogtada ah ee kooxda iyo in ay awood u leedahay in ay si deg deg ah dib ugula wareegto gacan ku heynta deegaanada istiraatiijiga ah.

Saraakiisha ammaanka ayaa ka gaabsaday inay ka hadlaan dhacdadan oo noqotay mid la yaab leh.

Dhanka kale, Gaashaanle Sare Xasan Cali Nuur Shuute, oo muddo dheer ka soo shaqeeyay Maxkamadda Ciidamada Qalabka Sida, ayaanan ku cusbeyn hanjabaadaha Al-Shabaab.

Isaga oo ah Guddoomiyaha Maxkamadda Ciidamada Qalabka Sida, waxa uu kormeeray dacwado dhanka sharciga ah oo ay ku lug lahaayeen xubno badan oo ka tirsan argagixisada oo ay ku jiraan kiisas badan oo ka dhashay xukunno iyo xukunno kala duwan oo lagu fuliyay xubno ka tirsan Al-Shabaab oo lagu helay dambiyo kala duwan.

Tani waxay shaki la’aan ka dhigtay Shuute in uu ka mid yahay bartilmaameedyada ugu sareeya ee Al-Shabaab ee liiska saraakiisha dowladda si loo qabto ama meesha looga saaro.

Dhacdadan ayaa muujineysa caqabadaha joogtada ah ee ay dowladda Soomaaliya kala kulmayso gacan ku haynta dhulalka laga xoreeyay kooxda Al-Shabaab.