Muqdisho ( Raxanreeb Online) Faaf faahino dheeraad ah ayaa kasoo baxeysa ciidamo katirsan dowladda oo xalay degmada Wadajir ku dilay guddoomiye Waaxeed katirsanaa degmadaasi.
Alle hau naxariisto marxuumka ayaa lagu magacaabi jiray Cabdullaahi Sheekh Axmed, waxaana guddoomiye Waaxeed uu ka ahaa Waaxda Xalane ee degmada Wadajir.
Goob jogayaal katirsan dadka deegaanka, ayaa inoo sheegay in sababta loo dilay guddoomiye Waaxeedka ay ka dambeysay, kaddib markii gelinkii dambe ee shalay ay shaqaaqo la xiriirto qoysaska Jaar ah ( deris) ay is dagaleen.
Guddoomiye Waaxeedka la dilay ayaa la sheegay in xiliga la dilayay uu u socday xalinta xiisada, balse ciidamada katirsan dowladda ay rasaas ku fureen isla markaana goobta ka baxsadeen.
Meydka marxuumka ayaa la geeyay xarunta dambi barista ee C I D, si baaritaano loogu sameeyo.
Sidoo kale warar madax banaan ayaa sheegaya in askarta dilka geysatay ay katirsan yihiin ciidanka Gorgor, ay gurmad ahaan ugu yimadeen mid kamid ah qoysaska is dagaalay.
Weli maamulka degmada Wadajir, kama aysan hadlin dilka xalay loo geystay guddoomiye Waaxeedka Xalane ee degmadaasi.
Leave a Reply