Beijing (Raxanreeb onlien) – Ra’iisul wasaaraha Itoobiya, Abiy Axmed ayaa maanta wada-hadallo la yeeshay guddoomiyaha golaha ku-meel-gaarka ah ee Suudaan Jeneral Abdel Fattah Al-Burhan, oo ay ka wada qayb-galayaan Madasha Iskaashiga Shiinaha iyo Afrika.

“Kadib kulankeenii bishii Luulyo, waxaan helay fursad kale oo aan kula kulmo General Abdel Fattah al-Burhan oo dhinac socda Madasha Iskaashiga Shiinaha iyo Afrika,” ayuu Ra’iisul Wasaaruhu ku soo qoray baraha bulshada.

Ra’iisul Wasaaruhu wuxuu intaas ku daray in wada-hadalladayagu diiradda lagu saaray arrimo badan oo labada dhinac ah iyo kuwa gobolka oo khuseeya labada dhinac.

Xusuuso Ra’iisul Wasaare Abiy Axmed ayaa gaaray Port Sudan July 9, 2024, isaga oo sii wada sida ay uga go’an tahay in xal waara loogu helo xasilloonida Suudaan.

Ra’iisul Wasaare Abiy ayaa booqashadiisa ka dib yiri: “Dhibaatada dadka walaalaheen ah ee Suudaan waa dhibkeena, nabadooda sidoo kale waa nabaddeena, sidaas darteed waxaan si adag uga shaqeyn doonnaa sidii shacabka Suudaan ay nabad iyo barwaaqo ugu soo dabaali lahaayeen sidii shalay oo kale.

Isagoo hadalkiisa sii wata ayaa waxuu shaaca ka qaaday in maadaama caqabadaha heysta shacabka Suudaan ay yihiin caqabado ina heysta, nabadoodana ay tahay nabaddeena, waxaa naga go’an in aan ka shaqeyno samata bixinta iyo barwaaqada shacabka Suudaan.