Muqdisho ( Raxanreeb Online) Bayaan kasoo baxay ciidanka Booliska Soomaaliya, ayaa lagu sheegay in taliska ciidanka booliska degmada Xamarweyne, soo  xireen weriye Cali Aadan Muumin, oo ku eedeyeen aflagaado uu u geystay madaxda Qaranka iyo qal qal gelin amni.

Booliska ayaa warka ay soo sareen ku sheegay in weriyaha sida ugu dhaqsiyaha badan lagu horgeeni doono maxkamadda awooda u leh in ay qaado dacwada lagu soo eedeeyey ee ah in ka shaqeynayay qalqal amni darro iyo inuu bartiisa Facebook, si toos ah aflagaado iyo dhalaceeyn ku soo qoray.

“Taariikh 01/03/2025 Muqdisho, Ciidanka Boliiska Soomaaliyeed gaar ahaan Saldhigga Boliiska Xamar Weyne ayaa soo xiray Eedeysane Cali Adan Muumin oo ku eedeysan Qal Qal galin Amni iyo aflagaado madaxeed.

Waxaana la horgeyndoonaa Maxkamadda awooda u leh” ayaa lagu yiri qoraalka kasoo baxay Booliska.

Sidoo kale Booliska ayaa muwaadiinta Soomaaliyeed  faray in aysan qeyb ka noqonin qalqal galinta amniga iyo faafinta wararka been abuurka ah.

Sikastaba, Cali Aadan Muumin, ayaa hadda ka mid ah dadka baraha bulshada ku qora wararka siyaasada ee Soomaaliya.