Jeddah ( Raxanreeb Online) Golaha Wasiirrada Arrimaha Dibadda ee Ururka Iskaashiga Islaamka (OIC) ayaa shalay oo Sabti ahayd kulan ku yeeshay magaalada Jeddah ee dalka Sacuudiga, kaas oo ay kaga hadleen arrimaha Soomaaliya.

Ururka ayaa si gaar ah diiradda u saaray arrinta haatan taagan ee ah aqoonsiga ay dhowaan Israa’iil aqoonsatay Somaliland, iyagoo sheegay inay taasi tahay “xadgudub”.

Xoghayaha Guud ee OIC Xuseen Ibraahim Daaha ayaa sheegay in aqoonsiga qeyb ka mid ah gobollada Soomaaliya ee ay samaysay Israa’iil uu yahay xadgudub cad oo ka dhan ah sharciga caalamiga ah, islamarkaana khatar ku ah amniga gobolka, isagoo xaqiijiyay in midnimada Soomaaliya ay tahay khad cas oo aan laga gudbi Karin.

Dhanka kale, OIC ayaa sidoo kale isla soo qaaday arrimaha Falastiin iyo xaaladda Qasa, iyagoo isla gartay in lasii guda galo wejiga labaad ee xabbda joojinta.