Muqdisho ( Raxanreeb Online) Xildhibaan Cabduqaadir Jeylaani oo kamid ah Mudanayaasha golaha shacabka,  ayaa sheegay in guddoonka Baarlamaanka looga baahan yahay inuu ilaaliyo xasanaada xildhibaanada, balse uusan hoos geynin Laanta  fulinta ee Xukuumadda.

Waxa uu sheegay Xildhibaan Cabduqaadir,  in asiga iyo xildhibaano kale in ay berri u socdaan magaalada Kismaayo, isla markaana uu ka dalbanayo guddoomiye Aadan Madoobe inuu u raaco Garoonka diyaaradaha, uuna arko sida loola dhaqmayo xildhibaanada dalka.

Waxa uu sheegay Xildhibaanka, in marnaba uusan qaadan doonin in lagu tunto xasaannada xildhibaanada, loona baahan yahay in la ilaaliyo sharafta xildhibaanada.

Sidoo kale Waxa uu ku eedeeyey wasiirka amniga ee Soomaaliya Cabdullaahi Sheekh Ismaaciil ( Fartaag) in ka badan 10 jeer uu qorsheeyey in uu qaarijiyo xiliga uu ku sugnaa deegaan doorashadiisa.

“Waxaan tagay deegaanka doorashadeyda oo aan joogay bil iyo bar, balse waxaan ka joogi waayay dowlada federaalka oo weerar igu ah maalin walba, waana qorsho uu damacsanaa inuu igu qaarijiyo wasiirka amniga ee Soomaaliya,” ayuu yiri Xildhibaan Cabduqaadir Jeylaani.

Kulanka maanta ay yesheen xildhibaanada Baarlamaanka ee golaha Shacabka, ayaa ahaa mi xasaasi ah  waxaana inta badan kulanka uu ahaa mid ay xildhibaanada ay eedo kala duwan ugu jeediyeen xafiisyada madaxweynaha iyo kan Ra’iisul wasaaraha Soomaaliya.