Muqdisho (Raxanreeb Online) Dowladda Federaalka Soomaaliya ayaa sheegtay inay waddo dadaallo lagu horumarinayo dhaqaalaha dhijitaalka ah, iyadoo qorshuhu yahay in dhallinyarada iyo hal-abuurayaasha Soomaaliyeed ay fursado dhaqaale ka helaan baraha bulshada.

Maareeyaha guud ee hay’adda isgaarsiinta Qaranka Mustaf Yaasiin ayaa sheegay in la xoojinayo wada-shaqeynta lala yeelanayo shirkadaha tiknoolajiyadda iyo baraha bulshada, si loo sahlo in hal-abuurayaasha Soomaaliyeed ay si rasmi ah uga faa’iideystaan adeegyada lacag-abuurka (monetization), isla markaana ay u abuuraan shaqooyin iyo dakhli waara.

Sidoo kale, dowladda ayaa sheegtay inay muhiimad siinayso horumarinta xirfadaha dhijitaalka ah, kor u qaadidda tayada wax-soo-saarka muuqaalada iyo ilaalinta xuquuqda hal-abuurayaasha Soomaaliyeed, si ay ula tartamaan suuqyada caalamiga ah.

Qorshahan ayaa la filayaa inuu fursado cusub u abuuro kumannaan dhalinyaro Soomaaliyeed oo ku shaqeeya baraha bulshada sida YouTube, Facebook, TikTok iyo aaladaha kale ee internet-ka, kuwaas oo rajeynaya inay dakhli ka helaan hal-abuurkooda.

Dhallinyarada wax ku soo gudbiya baraha bulshada ayaa sheegay in haddii qorshahan uu hirgalo, uu wax badan ka badali doono noolashood.