Laascaanood (Raxanreeb) — Dagaal xooggan ayaa maanta oo Axad ah ka qarxay duleedka magaalada Laascaanood ee xarunta Gobolka Sool, kaas oo u dhaxeeya Ciidamada Soomaaliland iyo kuwa xoogagga SSC-Khaatumo, kaas oo ka socda jihada bari ee Magaalada.

Wararka ka imaanaya Magaalada Laascaanood ee Gobolka Sool ayaa tibaaxaya in Ciidanka Soomaaliland ay dagaalka u adeegsanayaan Madaafiic iyaga oo duqeyn ka fuliyay gudaha Magaalada, walow aan weli si rasmi ah aan loo ogaan qasaaraha ka dhashay duqeynta.

Labada dhinac oo muddooyinkii u danbeeyay ku jiray diyaargarow dagaal waxaana Soomaaliland isku dayaysaa in ay dib u qabsato Laascaanood halka SSC doonayaan in ay ciidamada Soomaaliland ka qabsadaan Gooja-cadde.

Shalay ayey ahayd kolkii Ciidamada Soomaaliland ay duqeyn ka fuliyeen gudaha Magaalada Laascaanood, iyada oo Baraha Bulshada lagu arkayay sawirro laga soo qaaday goobaha ay ku dhaceen madaafiicda, kuwaas oo ay ku jireen xarumo ganacsi sida; shirkadda isgaarsiinta Magaalada iyo mid ka mid ah masaajidda Magaalada oo burbur soo gaaray.