Basra ( Raxanreeb Online) Qabiil ka soo jeeda gobolka Basra ee koonfurta Ciraaq ayaa sheegay inuu koox burcad-badeed Soomaali ah kala wareegay markab shidaal oo lagu afduubtay kaddib markii dagaal kula galeen Gacanka Cadmeed.

Sida ay sheegeen xubno ka tirsan qabiilka, ku dhowaad 40 qof ayaa u dhaqaaqay dhanka Gacanka Cadmeed, kaddib markii la ogaaday in markab shidaal oo uu lahaa ganacsade Ciraaqi ah la qabsaday, iyadoo shaqaalihii saarnaa lagu hayay gudaha markabka.

Kooxda ayaa la sheegay inay dadaal u gashay sidii ay u heli lahayd goobta markabka iyo cidda gacanta ku haysay, kaddibna ay qaadday tallaabo lagu doonayay in lagu soo furto markabka iyo shaqaalihiisa.

Wararka laga helayo dhinaca qabiilka ayaa sheegaya in markabkii dib looga wareegay kooxdii lagu eedeeyay burcad-badeednimada, iyadoo sidoo kale la sheegay in qaar ka mid ah la qabtay, halka qaar kalena ay goobta ka baxsadeen.

Dhacdadan ayaa kusoo beegmaysa xilli Gacanka Cadmeed iyo xeebaha Soomaaliya ay weli yihiin marin muhiim ah oo ay maraan maraakiibta ganacsiga iyo kuwa shidaalka, iyadoo amniga xeebaha iyo khatarta burcad-badeednimadu ay mararka qaar walaac ka abuuraan maraakiibta isticmaasha waddadan.