Mahaday ( Raxanreeb ) – Warar kala duwan ayaa ka soo baxaya deegaano ka tirsan Shabeellaha dhexe oo ay dib ula wareegeen kooxda Al- Shabaab halkaas oo dagaalo ay ka dhaceen.
Dagaalka oo ahaa mid aad u culus ayaa lagu soo waramayaa in kooxda Al- Shabaab ay ugu suurtagashay in ay qabsadeen deegaano muhiimb ah oo hoos yimaada degmada Mahadaay oo hore gacantooda ay ugu baxday.

Sida aan wararka ku helnay Al Shabaab ayaa dib ula wareegtay deegaannada Cali Fooldheere iyo Ciidciidka oo dhaca duleedka degmada Mahaday, halkaas bilooyin kahor looga saaray weerar dhiig badan ku daatay oo cir iyo dhul ahaa.

Ciidanka dowladda iyo kuwa dadka deegaanka ee ku sugnaa deegaannada Cali Fooldheere iyo Ciidciidka ayaa halkaasi isaga soo baxay , waxaana saakay lagu arkay deegaannadaasi xubno katirsan Al Shabaab oo kasoo tallaabay wabigga.

Dowladda Soomaaliya ma aysan faahfaahin dib ula wareegida kooxda Al- Shabaab ee deegaano ka mid ah Shabeellaha dhexe halkaas oo muhiim u ahayd ciidanka Dowladda Federaalka ah ee Soomaaliya.