Thailand ( Raxanreeb Online) Dagaallada ka socda xuduudda u dhexeysa Thailand iyo Cambodia ayaa galay maalintii saddexaad, iyadoo ay sii kordhayaan khasaaraha naf iyo maalba leh. Wararka ugu dambeeyay ayaa sheegaya in tirada dadka ku dhintay iska horimaadyadaasi ay gaartay ugu yaraan 33 qof.

Dagaalka ayaa sababay barakaca kumannaan qof oo rayid ah, waxaana la xaqiijiyay in in ka badan 138,000 qof laga daadgureeyay deegaannada ku dhow xuduudda Thailand. Sidoo kale, gudaha Cambodia, ku dhowaad 35,000 qof ayaa ka cararay guryahooda iyagoo ka baqaya dagaalka sii xoogeysanaya.

Xaaladda ayaa keentay in Golaha Ammaanka ee Qaramada Midoobay uu yeesho kulan degdeg ah oo lagu falanqeeyay xiisadda, iyadoo beesha caalamka ay muujisay walaac ballaaran oo ku aaddan in dagaalku isu beddeli karo xaalad dagaal ballaaran oo gobolka saameeya.

Waxaa weli soconaya wada-hadallo ay wadaan waddamo dhexdhexaadinaya labada dhinac, hase yeeshee dagaalka ayaa u muuqda mid aan si fudud lagu xallin karin marka la eego baaxadda khasaaraha iyo falcelinta labada dal.