Muqdisho ( Raxanreeb Online) Madaxwaynihii hore ee Soomaaliya, Maxamed Cabdullaahi Farmaajo, ayaa ka hadlay kulan dhex maray hoggaanka xisbigiisa iyo mas’uuliyiin ka tirsan Dowladda Federaalka Soomaaliya.

Farmaajo ayaa sheegay in kulanka uu diiradda saaray arrimo la xiriira xaaladda guud ee dalka, amniga, hannaanka doorashooyinka iyo sidii loo xoojin lahaa wada-hadallada siyaasadeed ee u dhexeeya dowladda iyo dhinacyada kala duwan ee siyaasadda.

Waxa uu xusay in xisbigiisu uu diyaar u yahay wada-shaqeyn iyo wadatashi lagu xallinayo caqabadaha jira, isaga oo carrabka ku adkeeyay muhiimadda ay leedahay in la ilaaliyo dastuurka, midnimada dalka iyo danaha shacabka Soomaaliyeed.

Sidoo kale, Farmaajo ayaa ugu baaqay madaxda dowladda iyo saamileyda siyaasadda inay sii wadaan wada-xaajoodyada si loo gaaro is-afgarad ku saabsan arrimaha masiiriga ah ee dalka, gaar ahaan doorashooyinka iyo dhismaha hay’adaha dowladda.

Kulankan ayaa kusoo beegmaya xilli ay socdaan kulamo siyaasadeed iyo dadaallo lagu doonayo in la helo isu soo dhowaansho u dhexeeya Dowladda Federaalka iyo dhinacyada mucaaradka.