Muqdisho ( Raxanreeb Online) Golaha Mustaqbalka Soomaaliya ayaa ugu baaqay waddamada ciidamada iyo shaqaalaha booliiska ku biirinaya Hawlgalka Midowga Afrika ee Taageerada iyo Xasilinta Soomaaliya (AUSSOM) inay ka dhigaan sii wadidda taageerada dhanka amniga mid ku xiran gaarista heshiis siyaasadeed qaran oo loo dhan yahay.

Warqad furan oo taariikhdeedu tahay 27-ka Luulyo 2026, ayuu goluhu ugu baaqay hoggaamiyeyaasha Uganda, Kenya, Itoobiya, Jabuuti, Burundi iyo Masar, ka hor shir heer sare ah oo la filayo inuu ka dhaco Kampala dhammaadka bishan, kaas oo looga hadlayo mustaqbalka AUSSOM iyo kala-guurka amniga Soomaaliya.

Goluhu wuxuu ka digay in Soomaaliya ay wajahayso qalalaase siyaasadeed iyo mid dastuuri ah oo sii xoogaysanaya, isagoo sheegay in muddo-xileedka Madaxweyne Xasan Sheekh Maxamuud uu ku ekaa 15-kii Maajo 2026-kii, halka muddo-xileedka Baarlamaanka Federaalkuna uu ku dhammaaday 14-kii Abriil 2026-kii.

Wuxuu xusay in dalku uusan weli gaarin heshiis siyaasadeed oo si ballaaran loo aqbalay, kaas oo qeexaya waddo sharci ah oo loo maro kala-guurka dastuuriga ah iyo doorashooyinka mustaqbalka.

Hadalka kasoo yeeray golaha Mustaqbalka Soomaaliya, ayaa ku soo beegmaya, iyada oo madaxda howlgalka Midowga Afrika ee AUSSOM, ay shaaciyeen in ciidamada howlgalkoodu uu ku eg yahay 31-da December 2026, isla markaana amniga guud ay la wareegi doonaan ciidamada xoogga dalka Soomaaliyeed.