Garoowe ( Raxanreeb Online) Wakiilka Qaramada Midoobay ee Soomaaliya, James Swan, ayaa wada dadaal diblomaasiyadeed oo lagu xallinayo ismariwaaga siyaasadeed ee u dhaxeeya Madaxda DFS iyo kuwa Maamul Goboleedyada dalka.

James Swan ayaa gelinkii dambe ee shalay la kulmay Madxaweynaha Puntland Saciid Cabdullahi Deni, isagoona ku qanciyay in uu ka qeyb galo shirka Golaha Wadatashiga Qaran oo maalinta Isniinta ka furmaya Muqdisho. Todobaadkii hore, wuxuu kulamo kan la mid ah la yeeshay madaxda Maamullada Koonfur Galbeed iyo Galmudug.

Waxaa lagu wadaa in sidoo kale uu kulan la yeesho Madaxweynaha Jubaland, Axmed Madoobe oo shalay dib ugu soo laabtay Magaalada Kismaayo.

Inkastoo hoggaanka Dowladda Federaalka looga fadhiyay qabashada howshan, haddana Wakiilka Qaramada Midoobay ayay huri waysay in uu qaato mas’uuliyad u muuqata in loo wakiishay, islamarkaana uu isu soo dhoweeyo mas’uulyiin muddo is-diidanaa.