Muqdisho (Raxanreeb online) – Wasiiru dowlaha Wasaaradda Arrimaha Gudaha iyo Federaalka Xukuumadda Soomaaliya Xildhibaan Saadaad Maxamednuur Caliyow, ayaa lagala watay ciidamo katirsan booliiska Soomaaliya, gaar ahaan qeybta VIP-da loo yaqaan, kuwaa oo ilaalo gaar ah u ahaa wasiirka.

Sidoo kale, Qoraal uu soo saaray Wasiir Saadaad Caliyow ayuu ku sheegay in ammar kasoo baxay taliyaha ciidanka booliiska Soomaaliyeed Jeneraal Asad Diyaano looga waday ciidankii ilaalada u ahaa, waxa uuna xusay in naftiisa halis ugu jirto amni darro maadaama ilaaladiisii laga watay.

Waxa uu sheegay Wasiirka in ciidanka ilaalada u ahaa laga watay laguna amray in xerada booliiska ku xaroodaan, waxa uuna intaa ku daray in xiriiro uu la ameeyay taliyaha ciidanka booliiska Soomaaliya ay u suurto gali weysay in uu helo.

”Ciidanka ilaalada ii ahaa kana tirsan Ciidanka Booliiska Soomaaliyeed qeybta VIP kuwaasoo ii ogolaanayo Sharciga Dalka, Maadaama aan ahay Xildhibaan ka tirsan golaha shacabka, ahna Wasiir dowlaha wasaarada arrimaha gudaha iyo dib uheshiisiinta, waxaa Ciidankii Ilaalada ii ahaa Anigoo Ku guda jiro shaqada Qaranka ayaa Taliyaha Ciidanka Booliiska Gen. Asad Diyaano Amar in ay iga tagaan  ay ku xaroodaan Hoggaanka Ciidanka Aniga waxba  ogeyn, markii aan isku dayey inaan La xariiro waa waayey” ayuu yiri Wasiir Saadaad.

Wasiiru dowlaha Wasaaradda Arrimaha Gudaha Xukuumadda Soomaaliya xildhibaan Saadaad Caliyow , ayaa caddeeyay haddii dhibaato amni darro ku timaado in masuuliyadaasi uu qaadi doono taliyaha ciidanka booliiska Jeneraal Asad Diyaano.