Kismaayo (Raxanreeb ) Kooxda Al- Shabaab ayaa weerar ku bilowday qaraxyo waxa ay ku qaadeen deegaanka Janaay Cabdaale ee gobolka   Jubadda  Hoose.

Weerarkan waxa uu ka dhacay saldhig ciidanka maamulka Jubbaland ay ku leeyihiin deegaankaas , halkaas oo laga maqlayay jugta hubka culus ee labada dhinac.

Sida wararka ay sheegayaan dagaalkan waxaa la sheegay inuu ku geeriyooday sarkaal ka tirsan maamulka Jubbaland kaas oo qayb ka ahaa dagaalka labada dhinac ku dhaxmaray deegaanka Janaay Cabdalle

Saldhigga la weeraray waxaa daganaa ciidamadda Mareykanka uu tababaro ee Danab iyo kuwa maamulka Jubaland, iyadoo la maqlayay hubka cul culus oo ay labada dhinac is weydaarsanayeen.

Kooxda Al-Shabaab ayaa sheegtay inay dagaal kula wareegeen degaanka Janaay Cabdalle oo 60km dhinaca Galbeed uga beegan Magaalada Kismaayo,  inkastoo aysan jirin warar madax banaan oo  ku saabsan sheegashada Al- Shabaab.

Isgaarsiinta deegaankaas ayaa  gabi ahaanba hawada laga saaray oo waxa go’an khadka isgaarsiinta

Ma jiro wax hadal ah oo kasoo baxay dhinaca Jubbaland iyo saraakiisha ciidamada dowladda ee ku aadan weerarkaasi khasaaraha badan dhaliyay.