Muqdisho (Raxanreeb Online): Dowladda Uganda ayaa heegan buuxa gelisay ciidamadeeda ka tirsan howlgalka AUSSOM ee ku sugan deegaanka Carbiska, duleedka magaalada Muqdisho, kaddib kulan uu Taliyaha Guutada 46-aad ee Qaybta 1-aad ee AUSSOM, Kornayl Saul Nabimanya, la yeeshay ciidamada.

Taliyaha ayaa ciidamada kula hadlay Saldhigga Hawlgalka Furinta ee Carbiska (FOB), isagoo ku boorriyay inay si joogto ah u ilaashadaan feejignaanta isla markaana diyaar u noqdaan wax ka qabashada khataraha amni.

Kornayl Nabimanya ayaa sidoo kale ciidamada u sheegay in ay jiraan walaacyo la xiriira dhaqaalaha lagu bixiyo howlgalka, isaga oo kula dardaarmay inay si masuuliyad leh u maareeyaan dhaqaalahooda oo ay ka fogaadaan kharashaadka aan daruuriga ahayn.

Taliyaha ayaa ciidamada ku ammaanay feejignaantooda iyo sida ay uga go’an tahay ka hortagga khataraha ka imaan kara Al-Shabaab, isagoo sheegay in loo baahan yahay diyaar-garow joogto ah si looga jawaabo caqabadaha cusub ee amni.

Nabimanya ayaa sidoo kale xusay in waajibaadka ciidamada uusan ku koobnayn muddada ay howlgalka ku jiraan, wuxuuna kula dardaarmay inay qaataan go’aanno wanaagsan oo mustaqbalkooda anfaca marka ay ka baxaan adeegga ciidanka.