Muqdisho (Raxanreeb Online): Dowladda Federaalka Soomaaliya ayaa si rasmi ah u caddeysay inay aqoonsan tahay madax-bannaanida, midnimada iyo wadajirka dhuleed ee Jamhuuriyadda Qubrus, iyadoo sheegtay in mowqifka rasmiga ah ee Soomaaliya uu yahay mid waafaqsan xeerarka caalamiga ah iyo qaraarrada Golaha Ammaanka ee Qaramada Midoobay.

Wasaaradda Arrimaha Dibadda iyo Iskaashiga Caalamiga ah ayaa bayaan ay soo saartay ku sheegtay in Soomaaliya ay mar kale muujisay ixtiraamka ay u hayso madax-bannaanida, midnimada iyo wadajirka dhuleed ee Qubrus, isla markaana ay raacayso sharciga caalamiga ah iyo qaraarrada Golaha Ammaanka ee Qaramada Midoobay.

Bayaanka ayaa sidoo kale xusay in Soomaaliya ay horey u aqbashay qaraarrada Golaha Ammaanka ee ku saabsan Qubrus, gaar ahaan qaraarrada tirsigoodu yahay 541 (1983) iyo 550 (1984).

Wasaaradda ayaa si cad u sheegtay in qoraal ama aragti shaqsiyeed aysan metelin mowqifka rasmiga ah ee Dowladda Federaalka Soomaaliya, iyadoo taasi kusoo beegmaysa qoraal uu dhawaan Guddoomiyaha Golaha Shacabka, Cabdulqaadir Maxamed Nuur (Jaamac), ku muujiyay taageero ku aaddan Waqooyiga Qubrus ee ay Türkiye taageerto.

Dowladda Federaalka ayaa sheegtay in Wasaaradda Arrimaha Dibadda ay tahay hay’adda u xilsaaran dejinta iyo ku dhawaaqista siyaasadda arrimaha dibadda ee Soomaaliya, iyadoo ugu baaqday dhammaan hay’adaha iyo mas’uuliyiinta dowladda inay dhowraan awoodaha iyo waajibaadka dastuuriga ah ee hay’adaha kala duwan.

Bayaanka ayaa sidoo kale lagu sheegay in Soomaaliya ay sii wadi doonto taageerada ay u hayso mabda’a Axsaabta Qaranka ee Midowga Afrika, oo ay kamid yihiin madax-bannaanida, midnimada iyo wadajirka dhuleed ee dalalka.

Arrintan ayaa meesha ka saaraysa in hadalkii Guddoomiyaha Golaha Shacabka loo fasirto inuu yahay mowqif rasmi ah oo ay Dowladda Federaalka Soomaaliya ka qaadatay xaaladda Qubrus.