Muqdisho (Raxanreeb) — Wasiiru dowlaha wasaaradda arrimaha dibadda xukuumadda Soomaaliya, Cali Maxamed Cumar (Balcad) oo wareysi cusub bixiyay ayaa ka hadlay dooda ka dhalatay dhabar-jabintii lagu sameeyay Xildhibaan Marwo Cabdi Bashiir oo isku sharraxday kursiga madaxweynaha baarlamaanka adduunka, kaas oo looga adkaaday.

Cali Balcad ayaa shaaca ka qaaday in arintaas ay dowladda u sameysay, ayada oo fulineyso ballan-qaad ay ka qaadeen dowladda Tanzania, islamarkaana ay kasoo baxday Soomaaliya.

Wasiiru dowlaha ayaa sharraxay waxa uu yahay ballan-qaadkaas, wuxuuna sheegay in Tanzania ay horay ula soo xiirtay Soomaaliya, ayna ka dalbatay inay ku garab istaagto ku guulaysato xilka madaxweynaha baarlamaanka adduunka, taasina ay sameeyeen.

Sidoo kale wuxuu intaasi ku daray in markii ay hore aysan Soomaaliya u sharraxneyn kursigaas, balse mar dambe oo laga joogo laba bilood ay isa soo sharraxday xildhibaan Marwo Cabdi Bashiir oo ka tirsan baarlamaanka federaalka, sida uu hadalka u dhigay.

Balcad oo sii hadlaya ayaa tilmaamay in go’aanka wasaaradda arrimaha dibadda iyo guud ahaan kan xukuumadda ay la wadaageen baarlamaanka, ugu dambeyna la’isku raacay inay tanaasusho gabadha u tartameysay Somalia, sidaasna lagu fuliyay ballan-qaadkii Tanzania.

“Labo bilood ama bil ka hor ayaa waxaa soo baxday gabar Soomaaliyeed oo rabta in ay u tartanto kursigaas. Annaga waxaan u sheegnay oo aan baarlamaanka u gudbinay, in kursigaas dowlad ahaan aan ka ballan-qaadnay inaan codkeena siino dalka Tanzania. Wadamaduna inay ilaaliyaan balan-qaadyadooda sumcaddooda ayaa ku jirta,” ayuu yiri.

Soomaaliya waxa uu sheegay in arrintan ay ku bedaleneyso kursiga aan joogtada aheyn ee QM, kaas oo ka dhexeeyo Soomaaliya, Tansania iyo Mauritius, balse dowladda Tanzania ay u qoreen qoraal ay kaga codsanayana in Soomaaliya ay uga tanaasulaan kursiga QM.

Hadalkan ayaa kusoo aadayo, ayada oo hadal heyn xoogan ay ka dhalatay guul -darada ay Marwo kala soo kulantay tartankii ay u gashay hoggaanka baarlamaanka adduunka.

Xildhibaanadda oo soo laabatay, isla-markaana bixisay wareysi ayaa qudheeda dhabar-jebinta lagu sameeyay ku eedeysay gudoonka baarlamaanka iyo xukuumadda Soomaaliya.