Boosaaso ( Raxanreeb Online) Kooxo burcad-badeed Soomaali ah ayaa la sheegay inay sii daayeen markab ay muddo afduub ahaan u haysteen, sida ay sheegeen ilo amni oo xogta u gudbiyay warbaahinta.

Ilo xog-ogaal ah ayaa sheegay in markabka lagu sii daayay xaalad aan weli si rasmi ah loo faahfaahin, iyadoo aan la shaacin magaca markabka, calanka uu watay, halka lagu afduubtay iyo waqtiga saxda ah ee la sii daayay.

Sidoo kale, weli ma cadda haddii sii deynta markabka ay timid kaddib wada-xaajood, heshiis ama lacag madax-furasho ah, maadaama ilaha amniga aysan bixin faahfaahin dheeraad ah oo ku saabsan dhacdada.

Markabka ka baxay gacanta Burcad Badeedda waxa ay kooxahaas afduubteen Bishii April ee Sannadkaan waxaana la socday 17 Rag ah sida ay ku warrantay Wakaaladda Wararka AFP oo xogtaan si kooban u faafisay.

Wararka ku saabsan sii deynta markabkan ayaa kusoo beegmaya xilli ay xeebaha Soomaaliya iyo guud ahaan Badweynta Hindiya mararka qaar ka dhacaan weerarro iyo afduubyo loo geysto maraakiibta ganacsiga iyo kuwa kalluumeysiga.

Inkasta oo burcad-badeednimada Soomaaliya ay hoos u dhac weyn ku timid marka loo eego sannadihii ugu xumaa, haddana khatarta weerarrada badda ayaa weli ah arrin ay si dhow ula socdaan hay’adaha amniga Soomaaliya iyo ciidamada badda ee caalamiga ah.