Muqdisho (Raxanreeb) – Madaxweynaha Soomaaliya Xasan Sheekh Maxamuud oo salaadda Jimcaha kula Oogay qaar ka mid ah masuuliyiinta dowladda Masaajidka Shuhadada ee Madaxtooyada Qaranka ayaa ka hadlay halka uu marayo halganka dalka lagaga xoreynayo Al-Shabaab, amniga iyo kaalinta shacabka Soomaaliyeed ay ka qaateen howllgaladda ka socda dalka.

Sidoo kale, Madaxweyne Xasan Sheekh Maxamuud ayaa ugu horeyn waxaa uu dhibaatada iyo xaaladda adag ee ay ku suganyihiin dadka reer Falastiin la qeybsaday Shacabka maatada ee ay waxyeelada ka soo gaartay duqeymaha Isra’iil ay ka waddo Qasa.

Dhanka kale, Madaxweynaha oo ka hadlaayay howlgallada socda ayaa shacabka Soomaaliyeed gaar ahaan kuwooda ku nool dhulka Miyiga ah ugu mahadnaqay kaalinta muuqata ee ay ka qaadanayaan howlgallada ay Ciidamada Qalabka Sida ku baacsanayaan khawaarijta howdka ku dhuumaaleysanaaya.

“Kalluunku wuxuu ku noolaanyahay biyaha, haddii barkadda biyaha ee uu kaluunku ku noolyahay laga daadiyo biyaha kaluunka kuma noolaan karo,Argagixisada iyo Khawaarijta biyaha ay ku dhaxnoolyihiin waa shacabka maantana Allah mahaddii shacabkii waa ay arkeen in nimankaan aheen kuwo ay sii xambaarsanaan karaan wayna diideen waxay ku soo jireen 16-kii sano ee la soo dhaafay.” Ayuu yiri Madaxweyne Xassan Sheekh.

Madaxweynaha Soomaaliya oo bilooyin ku sugnaa magaalada Dhuusomareeb ayaa dhawwaan dib ugu soo laabtay magaalada Muqdisho, kaddib safar uu ku tagay magaalada Asmara ee dalka Eritrea