GAZA (Raxanreeb ) Marinka Gaza waxaa wali ka socda duqeymaha ay fulinayaan diyaaradaha dagaalka Israel kuwaas oo ka dhan ah shacabka Falastiin.

Sida wararka la helayo ay sheegayaan Israel ayaa qaaday saacadihii la soo dhaafay weeraro xoog badan oo ay ka gaysatay deegaanada Marinka GAZA , iyadoo ay soo baxayaan baaqyada loo jeedinayo dhinacyada is haya.

Tiknikada israa’iil ayaa isku uruursanaya xuduudaha ay la leeyihiin marinka Qasa, ka hor inta aan la qaadin duullaanka dhinaca dhulka ee aadka loo filayo ee lagu bartilmaameedsanayo Xamaas.

Israa’iil ayaa sheegtay inay isu diyaarinayso hawlgal dhinaca dhulka ah, hase ahaatee ma sheegin xilli rasmi ah.

Wasiirka tamarta ee Israa’iil Katz ayaa bartiisa X (ex-Twitter) ku sheegay in aan wax koronto laga daari doonin, wax biyo ah loo sii dayn doonin, islamarkaana aan loo ogolaan doonin in gaadiidka shidaalka sidaa ay galaan, illaa laga sii daynayo dadka laga afduubtay gudaha Israa’iil.