Muqdisho ( Raxanreeb) Waxaa lagu wadaa in Maanra Aas Qaran Magaalada Muqdisho loogu sameeyo Alle ha u naxariistee Guddoomiyihii hore ee Golaha Shacabka Maxamed Sheekh Cusmaan Jawaari.

Marxuumka oo shalay ku geeriyooday Gurigiisa oo kuyaalla Magaalada Muqdisho ayaa waxaa la filayaa in Salaada Janaasada lagula dukado Masjidka Isbaheysiga Islaamka, isla markaana lagu Aaso Qabuuraha Sheekh Suufi oo kuyaalla Dhabarka dambe ee Tiyaatarka Qaranka.

Madaxda ugu sareeysa dalka, inta badan Madaxda dowladda Soomaaliya, Ehelada Maxruum Jawaari, Bahda Saxaafadda iyo Dad kale ayaa ka qeyb geli doona Aaska.

Alle ha u naxariistee Guddoomiyihii hore ee Golaha Shacabka Maxamed Sheekh Cusmaan Jawaari ayaa sanadkii 1945, ku dhashay degmada Afgooye ee Shabeellaha Hoose, wuxuuna ka baxay jaamacadda ummadda Soomaaliyeed, wisaga oo  ahaa Khabiir taqasusyo badan soo sameeyay xagga sharciga , kana soo shaqeeyay dhowr dastuur oo Soomaaliya yeelatay laga soo bilaabo 1960-kii.