Garoowe ( Raxanreeb ) in ka badan 40 maalin ayuu safar dibad ah ku maqan yahay Madaxwaynaha Puntland Saciid  Cabdullaahi Deni.

Masuuliyiin ka tirsan maamulka Puntland ayaa shalay sheegay in Madaxwaynaha maamulkaas uu shaqo dibada ah ku maqan yahay howsha xukuumaddana uu wado ku xigeenkiisa Axmed Karaash.

Hadalkan waxa uu ka danbeeyay markii xubnaha mucaaradka ay jeediyeen dhaliil ku saabsan maqnaanshaha Deni oo ay sheegeen in aan la ogayn halka uu ku sugan yahay.

Madaxwaynaha ayaa ku kala suganaa imaaraadka iyo Nairobi halkaas oo uu kulamo ka waday maalmahan , haddase isla magaalada Nairobi ayuu ka wadaa shirar kala duwan.

Su’aalo badan ayaa la iska waydiinayaa maadama safarka Madaxwaynaha Puntland uu dhaafay waqtiga Dastuuriga ah ee uu ku maqnaan doono dibada taas oo keentay muranka badan.

Mudada oggolaanshaha dastuurka Puntland ee madaxweynuhu uu dalka ka maqnaan karo ayaa xaddidan, iyadoo marka loo eego maqnaashaha madaxweyne Deni ay aad uga badantahay inta dastuurku uu fasaxayo.