Gaalkacyo (Raxanreeb Online): Madaxweynaha Dowladda Puntland, Siciid Cabdullaahi Deni, ayaa si weyn loogu soo dhaweeyay Gobolka Mudug, iyadoo shacabka iyo qeybaha kala duwan ee bulshada ay muujinayeen taageero iyo soo dhoweyn ay u sameynayaan Madaxweynaha.

Soo dhoweynta ayaa ka dhacday magaalada Gaalkacyo, waxaana ka qeybgalay mas’uuliyiin ka tirsan Dowladda Puntland, maamulka gobolka iyo degmada, saraakiisha ciidamada iyo qeybaha kala duwan ee bulshada.

Madaxweyne Deni ayaa intii uu ku sugnaa Mudug kulamo la qaatay qeybaha bulshada iyo saraakiisha dowladda, isagoo ka hadlay amniga, horumarinta gobolka, dowladnimada iyo xaaladda guud ee Puntland.

Safarka Madaxweynaha ayaa kusoo beegmaya xilli uu Gobolka Mudug ka socdo dhaqdhaqaaq siyaasadeed iyo mid bulsho, iyadoo Deni uu sheegay in shacabka gobolka ay door muhiim ah ku leeyihiin dowladnimada Puntland.