Muqdisho (Raxanreeb) — Agaasimaha NISA, Cabdullahi Sanbaloolshe, ayaa maanta isbaddel ku sameeyay hoggaanka hay’adda Nabad-sugidda, Sirdoonka Qaranka ee NISA, isaga oo sameeyay xilka qaadis iyo magacaabis cusub.

Cabdullahi Sanbaloolshe, ayaa taliyaha Nabadsugidda Gobolka Banaadir, u magacaabay Cabdifitaax Shaaweeye, waxaana xilkaas horay u hayay Muxiyaddiin Warbac muddo ku dhow labo sanno.

Cabdifitaax, Shaaweeye ayaa xilal kala duwan horay usoo qabtay, isaga oo soo noqday Taliye ku xigeenkii NISA ee gobolka Banaadir, marna soo qabtay xilka guddoomiye ku xigeenka amniga iyo siyaasadda ee maamulka gobolka Banaadir.

Sidoo kale waxaa Taliyaha Nabadsugida Garoonka Diyaaradaha Aadan Cadde loo magacaabay Cabdikhaadir Xaayow, waxaana xilkaas laga qaaday Gaashaanle Sare Xamdi oo dhowaan uun uu dalacsiiyay madaxweyne Xasan Sheekh Maxamuud.

Xaayoow, ayaa horey usoo noqday taliyaha NISA ee gobolka Shabeellaha Dhexe, isagoona kasoo shaqeeyay xarunta Aqalka Hoose ee Xamar.

Muxidiin Warbac, oo isna labadii sano ee la soo dhaafay ahaa Taliyaha Nabadsugida Gobolka Banaadir ayaa loo magacaabay Kaaliyaha Amniga ee hey’adda NISA.

Sanbaloolshe, ayaa qaaday tallaabadii ugu horreeysay tan iyo markii xilka loo magacaabay bilo ka hor.