Muqdisho (Raxanreeb ) meelo ka mid ah dalka waxaa ka soconaya dagaalka u dhaxeeya ciidanka Dowladda Federaalka Soomaaliya  iyo kuwa Al- Shabaab .

Laamaha amniga Dowladda ayaa sheegaya in ciidanka dowladda  horumar ay ka – gaareen dagaalka ka socdo gobolada qaar ee dalka .

Wasiir kuxigeenka Wasaaradda Gaashaandhigga Soomaaliya Xildhibaan Cabdifitaax Qaasim ayaa sheegay maanta oo Sabti ah  in kadib guulaha ay gaareen ciidanka Dowladda  ay Al-Shabaab soo codsadeen in wada-hadal lala galo.

Isagoo kula hadlayay Wasiir ku xigeenka xarunta Golaha shacabka saxaafadda ayaa sheegay in cid kasta oo ka tirsan Al-Shabaab ee dalkan u dhashay la soo dhaweeynayo balse kuwa Ajaanibta ah wadada kaliya ee u furan ay tahay inay dalka isaga baxaan.

Ma jirto ayuu yiri wasiir ku xigeenka wax meesha yaala oo lagula gorgortami karo  kooxaha ajaaniibta ah ee ka barbar dagaalamaya kooxda Al- Shabaab oo uu tilmaamay in ay ku jabeen dagaalka socda.

Si kastaba hadalkan ayaa imaanaya iyadoo wali meelo badan oo dalka ah ay ka socdaan – dagaalka u dhaxeeya ciidanka dowladda oo   gacan ka helaya kooxaha kacdoonka  iyo kooxda Al- Shabaab.