Faah faahino dheeraad ah ayaa waxaa ay kasoo baxayaan dagaal saaka waaberigii hore ka dhacay degaanka Goofgaduud Buureey oo katirsan Gobolka Baay ee dowlad Goboleedka Koonfur Galbeed.

Dagaalka ayaa waxaa uu ka dambeeyay kadib markii Xubno katirsan Kooxda Al-Shabaab ay weerar xoogan ku qaadeen Saddex Saldhig oo Ciidamada dowladda iyo kuwa Koonfur Galbeed ku leeyihiin degaanka Goofgaduud Buureey ee Gobolka Baay.

Goobjoogayaal ayaa sheegay inay siweyn u maqlayeen dhawaqa rasaasta ay isku adeegsanayeen labada dhinac, isla markaana gudaha degaanka uu siweyn uga dhacay dagaalka.

Saraakiil katirsan laamaha Amniga Koonfur Galbeed ayaa sheegay inay iska difaaceen  weerarkii kaga yimid dhinaca Al-Shabaab, isla markaana ay khasaaro gaarsiiyeen, hayeeshee Al-Shabaab oo weerarkaasi ka hadlay ayaa sheegay inay la wareegeen Saldhigyadii ciidamada iyo Guud ahaan degaanka Goofgaduud Buureey.

Wararkii ugu dambeeyay ee naga soo gaaraya Gobolka Baay ayaa waxaa ay sheegayaan in Ciidamo gurmad ah ay ku wajahan yihiin degaanka Goofgaduud Buureey, halkaas oo laga difaaco Magaalada Baydhabo ee Xarunta Gobolka Baay.