Berbera (Raxanreeb ) Guri ku yaalla Magaaladda Berbera gaar ahaanna xaafada Daaroole ayaa ku dumay qoys danyar ah oo deganaa.

Qoyskan ayaa ka koobnaa illaa shan qof, waxaana gurigaas dumey ku geeriyoodey hal qof oo kamid ah qoyskaaasi.

Sidoo kale waxaa jira dhaawacyo soo gaaray dadkii kale ee ku noollaa gurigaas dumey, iyadoo lagu daweynayo Isbitaaladda magaalada.

Gurigan ayaa kamid ahaa dhismayaashii hore ee Magaaladda Berbera taas oo sababtay inuu dumo.

Qaar kamid ah Dadka deegaanka oo u gurmaday qoyskaan ayaa sameeyay dedaal xooggan oo dhagaxaanta uga dulqaadaan dadka uu guriga ku dumay si looga badbaadiyo dhibaato kasoo gaarta burburka gurigaas.

Xubnaha qoyska ee waxyeellada soogaartay ayaa loo qaaday goobaha caafimaadka si loo baaro loona hubiyo xaaladdooda, halka qofka dhintay la geeyay guri deris lah gurigaas dumay si loogu diyaariyo in la dhaqo kaddibna la aaso.

Qaar kamid ah Dadka gurmadka sameeyay ayaa ku qaylo dhaaminayay in Dowladda Hoose ee Berbera soogaarto si ay u qabsato shaqadaan, qaarkood ayaa sheegay in aanay jirin gurmad dhankaas ka yimid.