Laascanood (Raxanreeb ) Wararka aan ka  helayno magaalada Laascanood ee gobolka Sool ayaa sheegaya in halkaas lagu dilay  ganacsade caan ka ah magaalada

Dadka deegaanka ayaa sheegaya in dilka ganacsadahan oo lagu magacaabi jiray Jaamac Cilmi Kadiye  (Jaamac Qaxooti) ay ka danbeeyeen koox hubaysan oo aan la aqoonsan ilaa iyo hadda.

Goobta dilka uu ka dhacay , waxaa soo gaaray ciidamo ka  mid ah dadka deegaanka kuwaas oo howlgal ka fuliyay hareeraha halka uu dilka ka dhacay.

Ma cadda sababta loo dilay ganacsade Jaamac Qaxooti, sidoo kalena lama garan haybta ragga dilay oongoobta ka baxsaday.

Dilkan ka dhacay , magaalada Laascanood ayaa noqonaya kii seddaxaad oo muddo todobaad ah ka  dhaca magaalada Laascanood ee gobolka Sool

Magaalada waxaa in muddo ah ku dagaalamayay ciidanka deegaanka iyo  kuwa Somaliland oo aan wali wax xal ah laga gaarin xiisada halkaas ka taagan.

Dadka deegaanka ayaa siyaabo kala duwan uga hadlaya dilka loogu gaystay magaalada Laascanood  mid ka mid ah ganacsatada caanka ka ah magaalada.