Garoowe (Raxanreeb online) – Madaxweyne ku xigeenka Puntland, Ilyaas Cismaan Lugatoor ayaa ka falceliyay su’aasha ku saabsan sababta dowladda Xasan Sheekh u taageeri la’ dahay dagaalka Puntland kula jirto Argagixisada Daacish ayaa Villa Somalia ku eedeeyay in ay caqabad ku tahay dagaalkaasi.

Sidoo kale, madaxweyne Lugatoor ayaa sheegay in Villa Somalia aysan wax taageero ah Puntland ku siin dagaalka Daacish, islamarkaana laga la’yahay Kaalmadii La-dagaallanka Argagixisada ee Caalamku ku bixiyay magaca Soomaaliya, waxaana uu intaasi ku daray in ay hor istaag ku samaysay qaadista dhaawacyadii dagaalka.

“Dowladda Federaalka annagu ka codsan mayno taageero, wayna ku fashilantay in ay gacan siiso dagaalka ay Puntland kula jirto Daacish, dhaawacii u dambeeyay ee la qaadi lahaa ayay hor istaagtay ogolaanshihiisa” ayuu yiri Madaxweyne ku xigeenka Puntland, Ilyaas Lugatoor oo ka falcelinayay su’aasha ku saabsan sababta dowladda Xasan Sheekh u taageeri la’ dahay dagaalka Puntland kula jirto Daacish.

Ugudambeyn, madaxweyne Lugatoor ayaa sidoo kale sheegay in aysan Puntland u baahnayn una baahan doonin ciidamo ka baxsan kuwa Puntland oo ka yimaada Federaalka ama meel kale, waxaana uu tilmaamay in ciidamada kala duwan ee difaaca Puntland si buuxda ugu filan yihiin Ciribtirka Argagixisada oo ay hadda ka saareen 65% dhulkii ay ku jireen.