Gacanka Cadmeed (Raxanreeb Online): Hay’adda UK Maritime Trade Operations (UKMTO) ayaa sheegtay in markab shidaal qaada uu ku dhawaaqay xaalad degdeg ah kaddib markii ay u soo dhowaadeen doon aan la fasaxin, xilli uu marayay Gacanka Cadmeed, meel qiyaastii 136 mayl-badeed bari kaga beegan Al Mukalla ee Yemen.

Warbixin cusbooneysiin ah oo UKMTO soo saartay ayaa sheegtay in markabka ay fuuleen lix qof oo hubeysan, kuwaas oo la wareegay gacan-ku-hayntiisa, isla markaana u leexinaya dhanka Soomaaliya. Mas’uuliyiinta ayaa sheegay inay baaritaan ku hayaan dhacdada.

Ilaa hadda lama shaacin magaca markabka, calanka uu sitay, xamuulka uu waday ama xaaladda shaqaalaha saarnaa.

Dhacdadan ayaa kusoo beegmaysa xilli ay hay’adaha ammaanka badda ay diiwaangeliyeen dhowr dhacdo oo afduub ah oo ka dhacay biyaha ku dhow Soomaaliya iyo Yemen. Warbixin UKMTO ah oo la soo saaray bishan waxay sheegtay in afar markab oo ganacsi ay weli gacanta ugu jiraan kooxo afduubayaal ah, kuwaas oo ay kamid yihiin MT HONOUR 25, MV SWARD, MT EUREKA iyo MT ASANA.

Fiiro gaar ah: UKMTO bayaankeeda ma aysan xaqiijin in dadka markabka qabsaday ay yihiin burcad-badeed Soomaali ah; waxa ay ku tilmaantay oo keliya lix qof oo hubeysan, sidaas darteed qodobkaas weli wuxuu u baahan yahay xaqiijin rasmi ah.