Yurub: Ruushka ayaa la sheegay inuu gacanta ku dhigay diyaarado badan oo aan duuliye lahayn (drones) oo ay leedahay Ukraine, taasoo walaac ka abuurtay qaar kamid ah dalalka Yurub.

Sida uu qoray The Wall Street Journal, saraakiil reer Yurub ah ayaa ka cabsi qaba in Ruushku uu mustaqbalka u adeegsan karo diyaaradahaasi weerarro lagu beegsado goobo istiraatiiji ah oo ku yaalla gudaha Yurub, isagoo isku dayaya in weerarka loogu ekaysiiyo mid ay fulisay Ukraine.

Walaaca ayaa salka ku haya suuragalnimada ah in haddii la adeegsado qalab militari oo asal ahaan Ukraine leedahay, weerar noocaas ah uu abuuri karo jahawareer siyaasadeed, isla markaana uu dhaawici karo xiriirka Ukraine iyo dalalka xubnaha ka ah NATO.

Si kastaba ha ahaatee, sheegashada ah in Ruushku qorsheynayo weerarro noocan ah weli waa walaac iyo qiimeyn dhinaca amniga ah, mana jirto caddeyn la xaqiijiyay oo muujinaysa in weerar noocaas ah la qorsheeyay ama la fulinayo.